Türkmenistanyň Ylymlar akademiýasynyň (TYA) Halkara ylmy-tehnologiýa parkynda geçirilen «Türkmenistane biotehnologiýalaryň toplumlaýyn ösdürilmeginiň ykdysady ähmiýeti» atly ylmy-amaly maslahata ýurduň öňdebaryjy alymlary we aspirantlary gatnaşdylar.

Maslahatyň möhüm tapgyrlarynyň biri TYA-nyň Tehnoparky bilen Hytaýyň Ylymlar akademiýasynyň Mikrobiologiýa institutynyň arasyndaky Özara düşünişmek hakyndaky Ähtnamany durmuşa geçirmegiň amaly ädimlerini ara alyp maslahatlaşmak boldy, diýip «Türkmenistan: Altyn asyr» habar berýär. Bu ylalaşygyň çäklerinde iki ýurduň alymlary oba hojalyk biotehnologiýasy we daşky gurşawy goramak ulgamynda bilelikdäki barlaglary alyp barýarlar. Mejlisiň dowamynda hytaýly professorlar Inwen Bin we Gan Lýunyň duza çydamly mikromisetleriň esasynda innowasion biopreparatlary işläp düzmäge bagyşlanan çykyşlary diňlenildi.

Şeýle-de tehnoparkyň birnäçe esasy ugurlar boýunça nazary gözleglerden başlap, önümçilige ornaşdyrmaga çenli bolan utgaşykly çemeleşmäni durmuşa geçirmekdäki gazananlaryna garaldy.

Ekologiýa we çölleşmä garşy göreş ulgamynda, biologik gabyklary emele getirýän, eroziýanyň öňüni alýan we gumusyň toplanmagyna ýardam edýän sianobakteriýalaryň ýerli ştammlaryny ulanmak arkaly Garagumuň süýşýän gumuny berkitmegiň üýtgeşik biotehnologiýasy önümçilige ornaşdyryldy. Senagat ekologiýasy pudagynda bolsa, ýerli ýagdaýa uýgunlaşan mikroflora arkaly nebit dökülmelerinden zyýan çeken ýerleri netijeli arassalamaga we olary gaýtadan dolanşyga girizmäge mümkinçilik berýän köp fazaly bioremediasiýa usuly işlenip düzüldi.

Maldarçylyga we guşçulyga goşulan goşant hökmünde ahalteke atlary üçin ýorunjanyň we gleditişiýanyň esasynda ýöriteleşdirilen balanslaşdyrylan iým garyndylarynyň döredilmegini, şeýle-de guşçulyk hojalyklary üçin mör-möjeklerden alternatiw, ýokary hilli protein almagyň tehnologiýasynyň özleşdirilmegini görkezmek bolar, bu bolsa importa garaşlylygy peseldýär.

Ýerli ösümlik çig mallaryndan (ýandak, maklýura, gandym/sazak, çomuç, arça) innowasion melhemleriň, efir ýaglarynyň we mikrokapsulirlenen fito-ýygymlaryň hatary döredildi. Mundan başga-da, galyndysyz önümçilik wezipesi çözüldi: üzümden işjeň antioksidant bolan resweratroly, şeýle hem ýerarmydyndan inulin, glýukoza we fruktoza bölüp almagyň tehnologiýasy işlenip düzüldi.