Türkmenistanyň iň iri gurluşyk kompaniýasy döwlet edaralarynyň, işewür toparlarynyň we halkara kompaniýalaryň wekillerini bir ýere jemlän «Ak şäherim Aşgabat» atly XXV halkara köpugurly sergä we maslahatyna gatnaşdy.

Türkmenistanyň Senagatçylar we telekeçiler birleşmesiniň hem-de Türkmenistanyň Söwda-senagat edarasynyň işjeň agzasy bolan «Ojar Aziýa»kompaniýasy bu halkara foruma däp boýunça gatnaşyp, ýurduň döwrebap infrastrukturasynyň ösüşine goşýan goşandyny görkezdi.

Serginiň çäklerinde «Ojar Aziýa» we onuň toparyna girýän kompaniýalar tarapyndan amala aşyrylan taslamalar, şeýle hem gurluşyk, ulag infrastrukturasyny ösdürmek we halkara logistika ulgamyndaky geljegi uly ugurlar bilen tanyşdyryldy.

Kompaniýanyň esasy taslamalarynyň biri sebitde halkara ulag aragatnaşyklaryny ösdürmek üçin strategik ähmiýete eýe bolan Sarahs – Mary – Serhetabat ýokary tizlikli awtomobil ýolunyň gurluşygydyr. Bu infrastruktura taslamasy Türkmenistanyň üstaşyr mümkinçiliklerini pugtalandyrýan Lapis-Lazuli, Demirgazyk – Günorta we Gündogar – Günbatar multimodal ulag geçelgeleriniň möhüm bölegi hökmünde garalýar.

Forumyň çäklerinde «Ojar Aziýa» we TMT Consulting Group kompaniýalarynyň ýolbaşçylary daşary ýurtly geljegi uly hyzmatdaşlar bilen birnäçe duşuşyklary we gepleşikleri geçirdiler. Hususan-da, dünýäniň dürli ýurtlarynda iri taslamalary durmuşa geçirýän «Zaha Hadid Architects» meşhur binagärlik kompaniýasy, şeýle hem Hytaý Halk Respublikasynyň iň iri döwlet gurluşyk kompaniýalarynyň biri bolan «China State Construction Engineering Corporation» bilen gepleşikler geçirildi.

«Ojar Aziýa» kompaniýasynyň «Ak şäherim Aşgabat» halkara sergisine gatnaşmagy Türkmenistanyň ulag taýdan özara baglanyşygyny ösdürmäge, halkara hyzmatdaşlygyny giňeltmäge we durnukly şähergurluşyk ösüşini ilerletmäge gönükdirilen iri infrastruktura başlangyçlaryny amala aşyrmakdaky işjeň ornunyň nobatdaky subutnamasy boldy.