Tapgyryň umumy aýratynlyklary:

Ýaryş tertibi: «Ahal» 5/15; «Nebitçi» 6/9; «Şagadam» 5/8; «Altyn asyr» 3/7; «Energetik» 5/7; «Köpetdag» 5/6; «Merw» 5/3; «Aşgabat» 6/3.

Iň köp ýeňiş gazanan toparlar: «Ahal» 5; «Nebitçi» 3; Şagadam», «Köpetdag», «Energetik», «Altyn asyr» 2; «Aşgabat», «Merw» 1.

Iň köp deňme-deň oýnan toparlar: «Şagadam» 2; «Altyn asyr», «Energetik» 1; «Merw», «Ahal», «Aşgabat», «Köpetdag», «Nebitçi» 0.

Iň köp utulan toparlar: «Aşgabat» 5; «Merw» 4; «Nebitçi», «Köpetdag» 3; «Energetik» 2; «Şagadam» 1; «Altyn asyr», «Ahal» 0.

30-dan aşa golçy: Ýokary liganyň şu möwsüminde tapawutlanan futbolçylaryň sany 31-e ýetdi. «Nebitçiden» Nurtagan Mämmedalyýew, «Energetikden» Alibek Abdyrahmanow, «Şagadamdan» Kerim Hojaberdiýew, «Altyn asyrdan» Zafar Babajanow dagy möwsümdäki ilkinji goluny geçirdiler.

Dört duşuşykda 10 gol: Tapgyrda derwezelere 10 pökgi geçirildi. Geçirilen pökgüleriň sany boýunça 6-njy tapgyr möwsümde üçünji orny eýeleýär. Undan ozal 1-nji tapgyrda 13, 3-nji tapgyrda 11 gol geçirilipdi.

6 tapgyrda 47 gol: Yzda galan 6 tapgyrda derwezelere 47 pökgi geçirildi. Her tapgyra, ortaça, 7,8 goldan, her oýunça, ortaça, 1,51 goldan düşýär.

“Nebitçi” – “Aşgabat” – 1:0

Gol: 48 Nurtagan Mämmedalyýew (“Nebitçi”).

«Öýümden aýlanaýyn»: Möwsümdäki 6 duşuşygynyň üçüsini öz meýdanynda geçiren «Nebitçi» şolaryň ählisinde gazanan ýeňşi bilen ikinji orna çenli çykdy. Täsin tarapy, «Nebitçi» şu ýyl myhmançylykda geçiren duşuşyklarynyň üçüsinde-de garşydaşlaryndan ýeňildi.

 “Ahal” – “Merw” – 3:0

Gollar: 25 Didar Durdyýew (11 m.u.), 39 Guwanç Abylow, 73 Merdan Gurbanow (“Ahal”).

Tapawut ýene artdy: Bäş duşuşykda bäş ýeňiş gazanan «Ahal» ýaryş tertibindäki iň ýakyn garşydaşyndan 6 utuk öňe saýlandy.

Durdyýewiň didary bombardirlikde: Soňky tapgyrlaryň ikisinde-de tapawutlanan Didar Durdyýew bäş duşuşykda 4 pökgi geçirip, bombardirlik ýaryşynda birinji orna geçdi.

5-nji gol 100-nji gol bolar: Şu tapgyrdan soňra Didar Durdyýewiň Ýokary ligada 2012-nji ýyldan bäri (biziň hasaplamalary ýöredip gelýän wagtymyzdan bäri) geçiren pökgüleriniň sany 99-a deňleşdi. Diýmek, hüjümçiniň Ýokary liga ― 2019-daky 5-nji goly soňky 8 möwsümdäki 100-nji goly bolar.

«Ahal» 10 golly ilkinji topar: 6-njy tapgyrdan soňra «Ahalyň» möwsümde geçiren gollarynyň sany 10-a çykdy. Röwşen Meredowyň şägirtleri 10 golluk sepgide ýeten ilkinji topardyr.

“Energetik” – “Şagadam” – 2:2

Gollar: 90, 90+1 Alibek Abdyrahmanow (“Energetik”) – 65 Serdaraly Ataýew, 76 Kerim Hojaberdiýew (“Şagadam”).

Ýene deňlik, ýene «Şagadam»: Şu ýyl alty tapgyrda bary-ýogy iki duşuşyk deňlikde tamamlandy. Şolaryň ikisinde-de garşydaşlaryň biri «Şagadam». Täsin tarapy, «kenarlylar» iki duşuşykda hem myhmançylykda oýnadylar.

Ataýewiň 50-nji goly: Şu tapgyrda geçiren pökgüsi tejribeli hüjümçi Serdaraly Ataýewiň Ýokary ligada 2012-nji ýyldan bäri geçiren 50-nji pökgüsidir. Ol çempionatynyň soňky 8 ýyldaky taryhynda 50 golluk sepgide ýeten 11-nji futbolçy boldy.

Hojaberdiýew iki 10-lugy doldurdy: Ýokary ligadaky ilkinji gollaryny 2015-nji ýylda «Energetigiň» düzüminde geçirip başlan Keri Hojaberdiýew şu tapgyrda 20-nji goluny hem geçirdi. Ol dürli ýyllarda «Energetikde», «Köpetdagda» we «Şagadamda» futbol oýnady.

Möwsümde altynjy, toparda ilkinji: Alibek Abdyrahmanow şu möwsümiň bir duşuşygynda iki gezek tapawutlanyp bilen altynjy futbolçydyr. Şol bir wagtyň özünde ol möwsümde «Energetikde» bir duşuşykda dubl eden ilkinji futbolçy.

“Altyn Asyr” – “Köpetdag” – 2:0

Gollar: 59 Zafar Babajanow, 78 Altymyrat Annadurdyýew (“Altyn Asyr”).

Bir çempionatda 540-njy duşuşyk: Şowsuz tamamlanan hem bolsa bu duşuşyk «Köpetdagyň» Ýokary ligadaky 540-njy ― ýubileý duşuşygydyr. «Köpetdag» bu netijesi bilen çempionatda iň kän duşuşyk geçiren toparlaryň sanawynda altynjy orny eýeleýär.