Ozal habar berşimiz ýaly, 13 — 15-nji oktýabr aralygynda Azerbaýjanyň Baku we Genje şäherlerinde Türkmenistanyň Medeniýet günleri geçirildi.

15-nji oktýabrda F.Amirow adyndaky Genje Döwlet filarmoniýasynda medeni forumyň ýapylyşy mynasybetli iki ýurduň sungat ussatlarynyň bilelikdäki gala konserti geçirildi.

Ýeri gelende bellesek, Türkmenistanyň Medeniýet günleriniň maksatnamasy dürli çärelere baý boldy. Hususan-da, 13-nji oktýabrda Geýdar Aliýew adyndaky merkezde Türkmenistanyň muzeý gymmatlyklarynyň, bezeg we amaly-haşam sungatynyň eserleriniň, türkmen halkynyň durmuşyny we ýurduň Garaşsyzlyk ýyllarynda ýeten sepgitlerini açyp görkezýän fotosuratlaryň sergisi geçirildi.

14-nji oktýabrda Deňizboýy Milli seýilgähinde türkmen halkynyň milli aşhanasynyň tagamlary tanyşdyrylydy. Seýilgähde gurlan, içi nepis halylar bilen bezelen gadymy türkmen ak öýi dabara gatnaşyjylarda aýratyn täsir galdyrdy. Türkmen aşhanasynyň lezzetli tagamlarynyň bu ýere ýygananlara hödür edilmegi bolsa milli myhmansöýerlik däplerini dabaralandyrýan waka öwrüldi.

Şeýle-de şol gün M.F.Ahundow adyndaky Azerbaýjan Milli kitaphanasynda «Türkmen edebiýatynyň burçunyň» açylyş dabarasy geçirildi. Dabaradaky çykyşlarda iki ýurduň arasynda edebi gatnaşyklary mundan beýläk-de giňeltmek maksady bilen, edebi eserleriň doganlyk halklaryň dillerine terjime hem-de neşir edilmegi boýunça alnyp barylýan işler dogrusynda gürrüň edildi we pikir alyşmalar boldy. Dabaranyň dowamynda görnükli türkmen şahyry Magtymguly Pyragynyň goşgular ýygyndysynyň azerbaýjan diline terjime edilendigi hem bellenilip geçildi.

Azerbaýjan Respublikasynyň häzirkizaman megapolisi Baku we taryhy müňýyllyklara uzaýan gadymy Genje şäherlerinde geçirilen Türkmenistanyň Medeniýet günleri iki ýurduň arasyndaky syýasy-diplomatik we söwda-ykdysady gatnaşyklar bilen birlikde, özara medeni dialogyň işjeňleşmegine hem döwlet Baştutanlary tarapyndan möhüm ähmiýet berilýändiginiň nobatdaky subutnamasyna öwrüldi.